მოზარდებისთვის

მოზარდები

რა არის ბულინგი

ბულინგი არის თანატოლთა შორის ძალადობისა და ჩაგვრის ერთ-ერთი ფორმა. რა თქმა უნდა, ყველა ძალადობრივ ქცევას ვერ დავარქმევთ ბულინგს და არ არის აუცილებელი, რომ ბულინგის ყველა ტიპი შეიცავდეს ძალადობას. საჭიროა ვიცოდეთ, რომ ბულინგი შესაძლოა გამოვლინდეს ნებისმიერ ადგილას და, ამასთან ერთად, არაერთი ფორმით. ბულინგში შეიძლება გავაერთიანოთ ქმედებები, დაწყებული ჭორების (ცრუ ამბების) გავრცელებიდან და სიტყვიერი შეურაცხყოფიდან, დამთავრებული ფიზიკური ძალადობით.

მნიშვნელოვანია გვქონდეს წარმოდგენა იმასთან დაკავშირებით, თუ როგორ უნდა მოვიქცეთ სხვადასხვა სიტუაციებში. როგორ მოვიქცეთ მაშინ, როდესაც თავად ჩვენ ვართ ბულინგის მსხვერპლი, მაშინ როდესაც ჩვენ ვესწრებით ან ჩვენი მეგობარია ბულინგის მსხვერპლი და მაშინ, როდესაც ვიღაც ბულერს გვიწოდებს.

თუ ხარ ბულინგის მსხვერპლი

შეიძლება, რომ ცხოვრების რაღაც ეტაპზე ჩვენ ან ჩვენი მეგობარი გახდეს ბულინგის მსხვერპლი, ან უბრალოდ შევესწროთ შემთხვევას, როდესაც ერთი მეორეს ჩაგრავს. ასევე არის იმის ალბათობა, რომ ვინმემ თავად თქვენ გიწოდოთ ბულერი:

  • პირველი, რაც ყველაზე მნიშვნელოვანია - უნდა შევინარჩუნოთ სიმშვიდე, როგორც უფროსები გვეტყვიან ხოლმე, ნერვებს არ ავყვეთ და თავი ხელში ავიყვანოთ 
  • რა თქმა უნდა, შურისძიებაც არ არის საუკეთესო პასუხი. სწორედ იმიტომ, რომ შურისძიების სურვილი არ გაჩნდეს და სიტუაცია ბევრად არ დამძიმდეს, ცხელ გულზე გადაწყვეტილებებს ნუ მივიღებთ.
  • აქვე ძალიან მნიშვნელოვანია აღინიშნოს, რომ არ უნდა ვცადოთ ფიზიკური ძალის გამოყენება ბულერების წინააღმდეგ.
  • მნიშვნელოვანია ვცადოთ მჩაგვრელთან მშვიდად საუბარი, შევეცადოთ ავუხსნათ, თუ რატომ არის ესა თუ ის ხუმრობა თუ საქციელი საწყენი თქვენთვის.
  • ასევე, ძალიან მნიშვნელოვანია, რომ მომხდარი ფაქტის შესახებ მოვუყვეთ იმ ადამიანს, რომელსაც ვენდობით და ვინც დაგვეხმარებათ ამ პრობლემის მოგვარებაში. ეს შეიძლება იყოს მშობელი, და-ძმა, მასწავლებელი, სკოლის ფსიქოლოგი და ა.შ..
  • ასევე, ერთ-ერთი რჩევაა მოვერიდოთ ისეთ სიტუაციებს, სადაც შესაძლებელია მარტო დავრჩეთ იმ ადამიანთან, ვინც ჩვენ გვჩაგრავს.

თუ შენი მეგობარი ბულინგის მსხვერპლია

როგორც ვახსენეთ, შესაძლებელია ბულინგის მსხვერპლი ნებისმიერი ჩვენ ირგვლივ მყოფი ადამიანი იყოს, მათ შორის ჩვენი ძალიან ახლო მეგობრებიც.

  • პირველი, რაც ამ შემთხვევაში უნდა გავაკეთოთ, ვუთხრათ და ვაგრძნობინოთ ჩაგრულ ადამიანს, რომ ჩვენ მის გვერდით ვართ და გავამხნევოთ ის.
  • ვაგრძნობინოთ ჩვენს მეგობარს, რომ ნებისმიერ დროს შეუძლია ჩვენთან მოსვლა და ნებისმიერ საკითზე საუბარი.
  • სამეგობროში მოლაპარაკების შემდეგ მივიდეთ ბულერთან და ავუხსნათ მას, რომ მისი საქციელი არასწორია და არ არის მოსაწონი თანაკლასელების მიერ.
  • გავესაუბროთ ჩვენს მეგობარს იმასთან დაკავშირებით, რომ საჭიროა მასწავლებელი ჩავრთოთ ამ საკითხში, რათა მან უფრო ეფექტურად მოაგვაროს პრობლემა.
  • ვუთხრათ მასწავლებელს ან სკოლის ფსიქოლოგს არსებული სიტუაციის შესახებ და დახმარება და რჩევა ვთხოვოთ მათ.

გეძახიან მოძალადეს

რა თქმა უნდა, არის ისეთი შემთხვევებიც, როდესაც შესაძლებელია ჩვენ თვითონ აღმოვჩნდეთ ბულერის როლში განზრახ თუ ძალაუნებურად, ან უბრალოდ ვიღაც აღგვიქვამდეს ასე, მიუხედავად იმისა, რომ საერთოდაც არ ვთვლიდეთ თავს ბულერად. ამ დროს ძალიან მნიშვნელოვანია:

  • თუ ვინმე განაწყენებულია ჩვენი ნათქვამის გამო, მნიშვნელოვანია ვაღიაროთ საკუთარი დანაშაული და ბოდიში მოვიხადოთ ჩვენი საქციელის გამო და ავუხსნათ მას, რომ მსგავსი შემთხვევა აღარ განმეორდება
  • მივმართოთ უფროსს, რომელსაც ვენდობით, რათა დაგვეხმაროს პრობლემის მოგვარებაში.
  • თუ ბულერი უბრალო გაუგებრობის გამო დაგვიძახეს, შევეცადოთ გავარკვიოთ ეს გაუგებრობა და მოვაგვაროთ არსებული პრობლემა.